معرفی رئیس جدیدالتقرر پوهنحی زراعت پوهنتون غور

محترم پوهنیار عبدالبصیر "سلطانی" که در سال ۱۳۹۳ هـ.ش از رشتهٔ اگرانومیِ پوهنتون بلخ فارغ‌التحصیل گردیده است، در سال ۱۳۹۶ هـ.ش به‌حیث استاد در پوهنتون غور تقرر حاصل نموده و به‌مدت دو سال به‌گونهٔ سرپرست، وظیفهٔ ریاست پوهنحی زراعت را به‌عهده داشت.
موصوف سپس به‌منظور ادامهٔ تحصیلات عالی، عازم کشور ترکیه گردیده و در سال ۱۴۰۳ هـ.ش از پوهنتون آتاترک موفقانه سند ماستری خویش را اخذ نموده است.
بنا بر لزوم‌دید رهبری پوهنتون غور و به‌اساس حکم شماره (۴۲۰۱) مؤرخ ۱۴۰۴/۹/۱۸ هـ.ش مقام عالی ریاست‌الوزراء امارت اسلامی افغانستان، نامبرده رسماً به‌حیث رئیس پوهنحی زراعت پوهنتون غور تقرر حاصل نمود.
مراسم معرفی رئیس جدیدالتقرر با حضور محترم مولوی مجیب‌الله "مُقری" رئیس پوهنتون غور، معاونین، رؤسای پوهنحی‌ها، جمعی از استادان و کارمندان این نهاد علمی برگزار گردید.
در این محفل، رئیس پوهنتون غور ضمن تبریک به استاد ماستر عبدالبصیر "سلطانی"، مسئولیت‌های اداری را امانتی بزرگ دانسته و بر صداقت، تعهد و روحیهٔ خدمت‌گزاری تأکید ورزید و با دعای خیر، توفیقات مزید موصوف را از درگاه الله متعال مسئلت نمود.

دوشنبه، ۱ رجب‌المرجب ۱۴۴۷ هـ.ق، برابر با ۱ جدی ۱۴۰۴ هـ.ش.